西餐大排檔 (已結業)

想搵一間好味又有特色既餐廳真係唔容易，然而大排檔加西餐真係令我印象深刻，今次再來除左有新菜式外，質素亦保持高水準！套餐有齊餐廳出色既菜色，最後決定揀紐西蘭羊鞍餐同黑毛豬肉眼餐，再加海鮮拼盤同甜品！首先來既係海鮮拼盤，個人認為海鮮拼盤係必加既，套餐優惠價69有生蠔、鮑魚、鮮蝦之外，重有帶子同聖子刺身，而且質素好好！生蠔鹹味較多，帶有少少蠔鐵銹味，就咁食已經好好味，如果再加上特製香草汁就更上一層樓，香草汁酸味為主，除左香草味濃之外，再帶有蒜香同少量芫茜味，同生蠔味道非常配！而另一個蜜糖芥末汁就配刺身的，甜味為主再帶有少少麵豉和酒味道，帶子刺身十分鮮甜，而聖子刺身口感爽嫩，對比明顯，鮑魚亦都濃味彈牙，最後鮮蝦肉質直頭係脆的，海鮮拼盤非常推薦！下一道菜係牛腩羅宋湯同松露磨菇湯，餐包係麥包，雖然唔及麵包軟，但反而本人更中意麥包口感同香味！至於牛腩羅宋湯，一上枱已經充滿牛肉香味，而入口後蕃茄香 同菜加上薯仔和洋蔥味融為一體，各種食材味道都出色而又唔會互相搶味！松露磨菇湯好特別，個人感覺比較偏中式，湯中菇味十足，而其中冬菇味更為特出，令整個湯好有中國色彩，而旁邊有黑蒜油，裝飾和加香功能兩全，非常好！