夏麵館 (始創中心)

營業中

休息中

捉住蟹粉季的尾巴，終於嚐個究竟…. 張曼玉題名嘅 Do Re Mi (哆唻咪) 超好食! 係一兩蟹黃、二兩蟹粉、三兩河蝦：蝦仁鮮爽，蟹醬口味自家調製，煮得恰到好處（已經超越我最鐘意嘅夏麵館煨麵地位🤭）就咁一匙一匙食好正，配饅頭都可以。蟹粉小籠包用鐵板煎脆好有驚喜，從來未試過嘅湯汁小籠包可以個底香脆又保持到皮薄餡靚！難度非常高嘅一道菜，拌鎮江醋食更正。蟹粉撈飯、蟹粉撈菜同精裝五小碟份量大，味道一流，食完大滿足。撈飯用以健康五常米，粒粒飽滿，配合蟹粉撈起，新一年一定金玉滿堂。高度欣賞五小碟：蒜香四季豆爽脆、虎皮素鵝鬆脆裏住金菇、海蜤頭青瓜超鮮甜、鎮江水晶肉精緻軟嫩、涼拌小木耳麻辣惹味。湯品：瑤柱豆腐羹熱辣辣，足料，仲落咗銀芽韭黃，冬天飲好舒服暖胃。甜點：開心果高力入面有流心醬，果仁味濃厚好好食；凍豆漿夠滑；夏伯伯酸梅湯值得一試，甜甜凍凍好適合解膩，好岩我哋口味（微微酸甜，甜度上佳）。