尚青商號 (已搬遷) 新店位置

舖喺樓上閣仔。樓下門面嘟二維碼同探熱位超悶焗。行到樓上收銀位，估唔到已經下午兩點半仲有兩組人等緊，佇立等候位置依然冇冷氣到，而且冇飛攞只能乾熱咁排隊等，後來嘅人唔想企樓梯排隊都知難而退⋯⋯奉勸唔等得真係咪嚟，要預咗啲食客都係文青式慢食而唔會秒速騰空番張枱出嚟。打卡位甚多，見圖，不過熱到36度條街都熔嘅時候，暑到變阿呆都冇乜心情自拍他拍。約廿分鐘後，汗濕之我們仨終有侍應招呼入最盡頭近窗邊之四人座，一下子由極熱到就坐至最冷凍位置。先嚟嘅「麻辣蒜香雞絲乾拌麵」揀咗小辣，所以突出咗「麻」味痺痺哋，雖然汁底唔多不過撈起辣辣哋幾滋味。枱邊有樽疑似辣椒醬，食開頂盡小辣嘅本人𢳂半匙，有xo 醬風味，亦都足以辣到臉出汗。再嚟嘅「台酒三杯雞飯」，寧舍大陣仗，用熱鍋熱住上。不過總覺調味差啲咩，辣就夠但調味唔夠層次。「椒鹽排骨雞湯幼麵」朋友反映湯頭有陣蔥油味，加埋d辣醬就更加香；雞扒炸得內脆又夠熱。順帶一提係老闆幾殷勤，主動引領我枱小朋友去廁所門口。總言：靚裝台式小店，啱慢活人士。