新贊記點心·小廚

營業中

休息中

最近迷上點心店，貪佢價錢實惠，食物質素亦唔輸蝕俾一般嘅茶樓，今日放工同先生搵到公司附近呢間新開張冇耐嘅點心店，嘆返個夜茶。餐廳點心選擇唔少，茶位費六蚊位，質素可以，仲免收加一，非常抵食。鮮蝦燒賣皇粒粒飽滿，非常足料，面頭嘅蟹籽亦俾得豪爽，一啖放入口，味道鮮美，口感彈牙。黑椒金錢肚醬汁味道香濃，入味之餘非常爽口。北菇棉花雞味道鮮甜，特別係魚肚，吸收哂雞汁嘅精華，鬆軟入味。脆皮鮮蝦腸份量足，內餡更加係足料，軟滑嘅腸粉包住香脆嘅脆網同彈牙嘅蝦肉，無論味道同口感都抵讚。炒蘿蔔糕外脆內軟，用上自家製XO醬去炒，零舍香口惹味，係先生嘅最愛。白灼油菜心份量頗多，鮮嫩翠綠，軟腍無渣。酥炸奶皇包一客一件，先生本來想叫炸饅頭，後來見到有炸奶皇包，不妨一試，果然冇令人失望，外層炸得香脆而且唔油膩，奶黃餡帶少少流沙質感，仲有淡淡嘅鹹蛋黃滋味，非常推薦。薑汁千層糕非常「夠薑」，入口帶有薑汁獨特嘅辛辣感，甜度唔高，口感煙韌。點心店嘅食物整體唔錯，即叫即蒸熱辣辣送上，兩個人食到捧住肚皮走都只係百零蚊一位，街坊價錢酒樓質素，店內空間寬敞而且座位舒適，係嘆夜茶嘅好選擇。