多彩皇宮

營業中

休息中

想去嘅餐廳冇開門，就去咗附近嘅茶樓望下，點知勁多人等位，行遠少少去到石硤尾嘅多彩皇宮，ok喎，直入唔使等。諗住叫下午茶特價嘅孖寶點心，但枱面得一張過咗膠嘅點心紙，問店員係咪直接寫上去，有冇marker pen？店員話可以喺張吉紙寫低想叫嘅點心號碼，正當我哋睇緊叫咩點心嘅時候，佢轉頭就拎咗張qr code過嚟叫我哋要掃code落單，仲熱心教我哋個code點用添，而家啲茶樓請到啲後生少少嘅夥記，態度又好嘅真係好難得，見到佢咁熱情，真係有啲感動。⭐香煎蝦米腸幾好喎，條條都煎到脆口，有用心煎。⭐煎釀茄子而家買少見少嘅雙層茄子釀魚肉，茄子半煎炸香脆多汁，件件都大大舊，好抵食👍⭐潮州蒸粉果隻隻飽滿嘅潮州粉果，入面粉葛、芫茜、蝦米、豬肉碎、花生等樣樣都齊，調味仲唔錯添。⭐千層馬拉糕呢個失色少少，馬拉糕鬆軟嘅，但甜度同鹹度都唔夠，鹹蛋黃落得少，略淡口。加一加茶錢，人均60蚊抵，飲啦。