麺屋飛丸

營業中

休息中

今日又到元朗覓食，見到呢間新開嘅拉麵小店，主打雞白湯，就一於試下。餐廳面積唔大，大約有十多個位，由於早去到，餐廳未算多人，但到十二點半左右，已經開始要等位了。飛丸特盛拉麵 :有三款湯底可以選擇，店員推薦塩味雞白湯最能夠品嚐到湯嘅原味，湯底呈奶白色，入口味道濃郁，飲得到雞嘅鮮味，配拉麵好好味。豚角叉燒肥瘦適中，微烤過後入口更香，完全唔覺得肥膩；慢煮雞胸嫩滑，口感軟熟；最大驚喜係雞肉丸，混有雞軟骨更有咬口；配料仲有味玉、粟米筍、竹筍及紫菜，食完好滿足。蒲燒鰻魚串 :賣相色澤非常吸引，鰻魚外皮燒得香脆，肉質依然保持鮮嫩，配上特製嘅鰻魚汁，份外鮮甜好味。免治雞肉棒 :入口軟熟多汁，同雞肉丸一樣，都混入咗雞軟骨，令口感更加特別，醬汁味道唔太濃，感覺唔會膩。拉麵加小食仲送罐裝飲品，仲要全日免加一，總括黎講都幾抵食。