鳴門魚市場居酒屋 (已結業)

以前去金雞搭小巴番學既時候已經成日見到呢間港式日本野，幾年後既今日終於係旺角諗唔到食咩最後黎鳴門食啦坐低好快就叫左野食。價錢睇落都唔算平，但裝修都幾有日本居酒屋feel，有晒d木牌寫住有d咩酒呀魚生呀咁樣，坐得都舒服。不過係等緊野食既中途男朋友突然話唔好望過去左邊，心諗做乜，唔通有咩驚喜俾我？點知原來係因為有我最驚既野－－曱甴。於是我都好乖無望，淨係見到幾個waiter竊竊私語又眼望望我後面既位置。心諗餐廳正常係會有曱甴，但行到出鋪面我諗佢廚房呀後欄呀應該更加不得了過左陣男朋友話已經處理左，d waiter都散開左，個心先無咁驚，雖然知道左呢道衛生情況可能唔係咁好之後食佢地d野又係一大考驗。壽司同丼係正常野，火炙燒得好香，不過壽司卷除左面個塊三文魚之外入面都係d好cheap既野，都係青瓜蛋同蟹柳，80幾蚊值唔值就自己衡量啦煎蛋卷有好香既烘燶芝士味，不過面頭既海膽係又少又無味當佢係普通蛋卷會好過d。總括黎講野食唔算出色，價錢唔係特別抵，加埋咁大隻曱甴通街走，無辦法唔俾劣評。