辣媽川湘私房菜

營業中

休息中

本身中意食辣同川菜，聽朋友介紹元朗呢間川菜嘅酸菜魚好味，所以特登入黎試下😋閒日嘅2點鐘唔洗等位，不過都坐滿左9成，見住侍應執枱俾我哋，但因為佢只係用用過嘅抹布抹走枱面上嘅食物殘渣，冇再用清潔劑，所以枱面都覺得好油膩，感覺唔係咁衛生，送來嘅水我都唔敢飲，因為明顯個杯係未洗乾淨，有污糟野，即刻印象都大打折扣👎🏻食物方面，叫左川北涼粉（中辣）、酸菜魚套餐（大辣）、香辣鍋（中辣）我平時食譚仔係食中辣程度，叫左個中辣嘅川北涼粉都覺得好辣，食得有啲辛苦，反而其他兩道菜嘅辣度無問題，係涼粉比較重手😅酸菜魚係套餐嘅關係，所以唔係有好多塊魚肉，不過好在係食唔到一條魚骨，口感好滑，香辣鍋裏面有田雞、香菜、薯仔、魷魚、蝦，裏面最好食嘅竟然係薯仔，好入味。整體食物質素來講都算唔錯，如果可以改善到衛生問題就更加好，始終疫情期間大家都想安心進食。