King's & Queen's 冰室 (已結業)

趁放假同哥哥一於去街街，想要有少少郊遊feel ，於是諗到又嚟西沙行下舒展一下筋骨，又可以再嚟呢間茶座，一邊食下野hea 下，一邊同貓貓玩下，真係一樂也。嚟呢庋其實交通非常方便，可以於沙田市中心坐巴士299x，於「泥涌站」落車，然後過對面就係啦。呢間冰室環境確實不錯，超多打卡位。室內有很多各有特色牆畫，增添了不少文藝氣息！除了室內座位，亦可選擇室外，可以吸收一下陽光氣息。店內仲養有兩隻短毛貓，可以同貓店長影下相添。食物方面選擇十分多，我直頭覺得似酒家小廚。除了各款小菜、炒粉麵飯，海鮮類、小食或甚至煲仔菜都有供應。《椒鹽白飯魚》（$98），呢個菜值得一讚，白飯魚炸得鬆脆而不油，椒鹽十分惹味。由於慢慢嘆慢慢食，即使放耐了仍然爽脆可口。《招牌菠蘿咕嚕肉》（$88），好耐無食，所以突然好想食。份量頗多，整體味道ok ，而甜酸味適中。《星洲炒米》（$78），炒得夠乾身，口感很好。不過個人口味喜歡濃郁，如果咖喱香味加多一點就更佳了。最後加埋杯凍奶茶（$18），非常完滿了。 一邊享受美食，一邊沐浴在大自然之中，十分放鬆舒𣈱，確實是假日的一個好去處。