第二街餐廳 (已結業)

返學返得咁攰，一放飯就梗係要食返啲好嘢補充下能量啦！雖然我哋喺上環返學，不過唔知點解就係鐘意走到去西環果邊食晏。今次又係有位地膽同學推薦我哋嚟食呢間第二街餐廳。店面睇落其實都幾細間下，但係聽地膽講呢間有個餐特別推薦，好受歡迎。就係111號餐香燒雞扒配黑松露野菌汁，可以選擇配飯或意粉嘅，我就揀咗要飯、熱華田。飯前原來仲附送一碗湯添，可以揀係羅宋湯(紅湯)或者忌廉湯(白湯)，我就飲白湯啦，由細到大我都好鍾意飲忌廉湯嘅。飯到啦！真係好香喎！有菜有粟米，雞扒上面又淋有啲燒汁同香草，食落好嫩口，一啲都唔老又冇根喎。一啖雞一啖飯咁，唔覺唔覺食晒啦。不過啲飯就硬咗少少，如果煮得軟返啲就真係perfect啦！