真鮨 (已結業)

呢條街有唔少唔同菜式嘅食肆，去"韓國街"好多時亦都會經過，呢日忽然發現有間唔錯嘅小店，唔係好出名，但就比預期中好味。入門口先上幾級樓梯，原來只係得約十張枱，我吔冇訂枱，差啲冇位。好吸睛嘅餐具，好日本.....刺身，壽司，串燒，日式小食，天婦羅等各樣日式食物都有，仲有多種原條魚刺身，今次我吔就先試試壽司。三文魚籽海膽壽司可以話係最多人點，原來真係要試，只睇個樣已經好吸引，好滿嘅三文魚籽同海膽，超正！而其他壽司都好好味，特別要試呢度都出名嘅火炙系列，燒得啱啱好，唔太生唔太熟。串燒方面都有驚喜，燒鰻魚比平時見嘅大串，好厚肉，燒完仲有唔少鰻魚汁，唔會太乾身。不過燒豆腐就唔係太啱口味，豆腐比較硬，上面有啲木魚絲，汁唔多，顥得豆腐更乾，唔易入口。又到我差不多每次日本菜都要試嘅燒玉子，呢度有原味，芝士鰻魚，同埋明太子口味揀，今次揀咗芝士鰻魚味，個樣好靚，好足料咁。玉子好甜好香蛋味，夾住嘅芝士同鰻魚唔多但啱啱好，唔會蓋過玉子味，仲有少許汁淋係上面，再加上紫菜，好滿足！最後仲有燒多春魚，燒得好好，每條都好完整，又唔會太鹹，讚！