合成茶餐廳

營業中

休息中

今日午餐搵咗好耐都無車位，上水午餐時間好繁忙！終於有個標位！泊低架車在呢間餐廳門口！都唔唸咁多入去食！已經下午茶時間，餐廳三四枱客！我哋坐到卡位，餐廳普通茶餐廳格局！陳設殘舊！見個男店員用極重嘅漂白水味嘅毛巾抹桌椅！以為餐廳好乾淨？可惜實際唔係！所有牆角邊嘅位都黑嗎嗎，我食完個好味嘅炒飯，去個廁所，比個廁所倒盡胃口（好在食完先去）行去廁所段路，滑到好似踩冰一樣，入到廁所！地下又係滑過冰地（實在好危險），仲要踎廁，個廁所所有隙縫全部黑色的（包括踏腳位置），門鎖已壞，用一塊木條代替！（我唔想倒大家胃口，唔影個廁坑）我明白清潔廁所係一件厭惡性工作，但點解可以容忍個廁所咁差嘅情況？（員工都係去呢個廁所啫！）即使食物唔錯，我有得揀一定唔會再去呢度！（如果餐廳嘅人睇到，真心希望你哋會改善下）咸魚雞粒炒飯：雖然係下午茶，份量都好大碟，炒得金黃色飯粒，粒粒分明，簡單只有生菜絲、雞肉、咸魚（咸魚真係見到一粒粒咸魚仔碎）咸魚咸香，好搶味，雞肉淋身唔嚡，生菜絲爽脆，咸咸香香好味！熱檸茶微澀，加糖都可接受！店員好爽手，落單上菜收錢，好爽快！如果唔係個廁所，我一定會讚！