宴薈海鮮酒家 (已結業)

同屋企人食飯，通常食廣東菜；今次試吓搞搞新意思，去任食火鍋。呢晚揀咗位於觀塘嘅宴薈海鮮酒家。四季火鍋放題貨真價實乜都任食，由紅白肉，蔬菜，甜品，到汽水啤酒，2.5小時內，食到幾多都冇問題。最少一台有兩個食客，就可以了！獨行俠就要揾到多個人一齊嚟先得咯。有屋企人唔係太舒服，所以點左一個比較清淡嘅湯底；但唔使太擔心味道清淡得濟，調味料都放響自助區，客人可以自行混醬。同時間，去埋凍櫃拎汽水或者啤酒同埋甜品，可惜係爭個托盤，否則可以一次過拎曬。任食火鍋全部食材都係經過點餐紙落單，然後由廚房按客人數量分配，例如有四個食客，水餃寫「一」嘅話，上碟會有四隻水餃。下圖係鳳城水餃，入面有豐富蝦肉，無話因為任食而偷工減料。黑豚肉肉味十足，新鮮有口感，似乎來貨都唔錯。紅肉以外，都試一試白肉。鮮滑雞肉都係好新鮮，相當唔錯。芝心丸同埋魚腐亦係火鍋必備之選。魚皮就咁食就好香脆，淥一淥吸盡湯底精華，又有另一番滋味。份量好多，廚房出食材絕不吝嗇，呢點值得稱讚。習慣有澱粉質的話，可以點個烏冬，咁就一定飽肚。