Thai Fire

觀塘一到lunch time就人山人海，想食得舒服少少，去咗樓上泰國私房菜Thai Fire食lunch。餐廳座位闊落，以柔和灰粉紅及大地色系營造溫馨自然嘅氛圍。Lunch set選擇好多，價錢$88-$118不等。泰式紅咖喱牛飯($88)牛腩炆得軟腍鬆化，毫不鞋口。紅咖喱甜甜地，辣度溫和。泰火豬豬瀑布公仔麵($108)賣相超級打卡！公仔麵如瀑布般傾瀉而下，效果澎湃！公仔麵炒得乾身香口，味道辣辣地，非常惹味，加埋芽菜、洋蔥、蘿蔔絲等同炒，鑊氣十足！豬頸肉燒至邊邊位脆口，口感爽彈，豬肉串燒都好好食，香料味突出，醃得入味，口感嫩滑。無骨鳳爪（套餐加配$28)份量好多，鳳爪去骨，食嘅時候啖啖肉，好方便。鳳爪清涼香辣，好清爽開胃，夏天熱辣辣食好消暑！彩虹椰汁糕都係呢度嘅招牌，賣相七彩繽紛，確實好打卡！如果口感軟糯D就更好啦！呢度嘅飲品選擇好多，泰式奶茶上加咗忌廉及灑上彩虹糖，少女心滿滿！龍眼冰則清新解渴，不過兩者都甜度稍高，如果可以揀少甜會更加貼心。