Plato Cafe & Bistro (裕民坊YM²)

以往髒兮兮嘅裕民坊自從重建成「凱匯」之後，呢度就大翻身一躍成為左觀塘區內最高檔嘅豪宅。日前同女朋友去睇完樓，就決定喺屋苑平台嘆個dinner。女朋友想靜靜地食西餐，所以就決定黎「Plato」食。作為開喺豪宅嘅西餐，Plato嘅用餐環境絕對係一流。餐廳裝修非常精緻，店員殷勤有禮。Menu方面，食物選擇頗多，價錢合理。我地當晚order左「西班牙海鮮飯」同埋「煎羊架」。西班牙海鮮飯唔單止賣相吸引，更加係非常足料：有一隻好大隻嘅大蝦同埋刺身級帶子，另外仲有啲其他貝類。羊架同樣賣相唔錯，餐廳按照我要求煎得啱啱好，肉質仲係好juicy。值得一讚係啲薯條好香脆，而且份量都唔少！飲品方面，女朋友order左一杯玫瑰朱古力。呢杯朱古力造型一流，佢亦讚好香濃嘅朱古力味。正！餐湯係熱辣辣嘅南瓜蘿蔔湯，味道好好。