王牌冰室 (南豐紗廠) (已結業)

其實我地成日都會出荃灣，因為荃灣有好幾個大商場，會有小朋友廁所，又會有好多其他育嬰設施，啱哂我地呢啲有小朋友嘅家長。之前成日聽朋友介紹，南豐紗廠有好多打卡靚位，咁嗰日去開荃灣，我地就過咗去南豐紗廠到行下，順便食埋個早少少晚飯。行下行下，就揀咗呢間「王牌冰室」啦！我地絕對係比佢個招牌同環境吸引咗入去㗎！而且「王牌冰室」隔離，連住間「 王牌冰茶」，都係佢地㗎！舖頭入面仲有句「是是旦旦叉燒蛋飯」，所以我一嚟就揀咗個「蝦仁叉燒炒滑蛋飯」，味道果然好，而且滑蛋真係好滑，飯底係豉油配香飯底，唔怕個飯冇味。再嚟一個清清地嘅「蟲草花北菇蒸滑雞」，啲雞真係滑嘅，成個餸好香，仲熱辣辣上枱。健康之人必叫菜，因為冇哂生菜，我地就叫咗「蒜蓉炒白菜仔」，好似一個好普通嘅菜，的確係，但熱辣辣上枱，真係我都食唔停口。最後，食飽飽又點可以唔飲嘢，我係勁愛奶蓋之人，所以就揀咗「王牌冰茶」嘅【焦脆奶蓋 • 東方美人】，真係超好飲，奶蓋加咗啲脆脆嘅焦點，配埋東方美人茶，真係絕配。總結：冰室嚟講，有好多唔同類型嘅餸菜揀，有啲仲係「王牌冰室」獨有嘅，記住，食完飯一定要叫返杯茶飲，咁就完美啦！