Gusto Restaurant & Bar (已結業)

銅鑼灣嘅V Point，唔單止係美食嘅集中地，而且間間餐廳仲要價格唔平。但今日嚟到呢間西餐，食物質素好之餘，價格仲十分宜人添! 餐廳環境寬敞，唔會似其他酒吧餐廳燈光太過昏暗，同朋友傾計就非常適合。食物方面，先叫一客香煎鵝肝，金黃色嘅賣相，已經甚具吸引，上枱時仲香味十足，再切落去質感軟滑，有入口即溶嘅感覺。接著兩道主菜亦十分出色，鮮蝦蕃茄天使麵，用上大大隻鮮蝦，蝦肉有彈性而豐厚，鮮甜味十足，而蕃茄跟天使麵非常匹配，醬汁能夠緊緊鎖在麵條上，夠晒惹味。而Baby Ribs亦係我地嘅摯愛，用上先煎後烤嘅方式處理，令Ribs可以鎖緊肉汁之餘，亦可以有香烤嘅感覺。而用上炸甜蕃薯條，比起一般薯條更滋味，甜味更濃郁。最後來一客Tiramisu，食法相對接近外國，可以先用手指餅浸在Espresso之中，然後再放在Tiramisu之中一齊進食，咁樣就可以一次食到3種口味，層次夠晒豐富。