春風三月 (已結業)

今時今日，一街都珍珠奶茶，冇乜賣點真係搵鬼幫襯。飲過無數珍奶嘅我，近日有朋友叫我去試試春風三月，於是我決定去元朗會一會佢。位於千色背後，前面有幾間大型連鎖台灣飲品店，要突圍難免要有爆點。睇餐牌，咦！咁得意？原來以有唔同味道嘅珍珠作招徠！叫咗杯超級珍珠奶茶，再加多杯同屋企人返家慢慢嘆，本身想試Baileys珠，點知賣晒，就改叫Double玫瑰綠茶。等咗一陣飲品就到，擁有同深圳最火嘅X茶一樣高高長長嘅杯，內有茶包浸泡，茶味更香濃突出。先講超級珍奶，奶味同茶味比例得好，誰都不會搶誰風頭！珍珠有種濃濃嘅，好似係咖啡嘅味道，質地Q彈，越食越想食！至於玫瑰綠茶，可能茶包浸咗15分鐘，好濃嘅綠茶味，而珍珠係玫瑰味，晶瑩剔透嘅珍珠內有玫瑰花，又靚又香又好味！最讚嘅係個杯蓋，茶包會阻住你啜珍珠，杯蓋有得擰開1/4，咁你支飲管就可以伸入去撥開個茶包啦！咁有心又好味嘅小店，希望佢生意興隆！下次我一定要試到Baileys珠！