小竹簍冒菜

營業中

休息中

今晚一個人，就貪方便喺附近搵食，唔使煮。就諗起呢度有得食冒菜，就想嚟試下。冒菜聽得多，但係未食過。 今日就衝住冒菜而嚟，六點左右入到去，就有位助手嬸嬸叫我隨便坐。座位旁邊有點餐紙同筆，我好認真仔細咁填好張紙。然後，有一班後生仔入咗嚟，坐咗喺我旁邊。佢哋好明顯係熟客仔，用好純熟嘅普通話同老闆娘打招呼。於是，我就跟住佢哋點餐嘅方法照做。方法係填好張點餐紙，然後，直接交畀櫃檯老闆娘，等佢確認咗之後，就可以坐定定等食，佢煮好就會嗌ｄ餸名，你過去攞就得。食完先找數。唔知係咪因為老闆娘同班後生仔好好傾，一直都講普通話，同我講嘢都用普通話，我唔清楚佢其實識唔識聽廣東話呢，所以我都被逼同佢講咗啲唔鹹唔淡嘅普通話 (汗顏)。我叫咗一號餐六個淨餸，要小辣，唸住試試味道。嘩！個湯頭一啲都冇令我失望， 一啲都唔馬虎，有花椒嘅麻辣，夠曬野味。秘製牛肉都好好食。其他餸好似海帶咁，雖然唔係煮咗好耐，但都好入味。可能因為個湯夠濃，所以啲餸容易掛到湯。好好食，非常之正！食到中途，原本應該要加飯，但太愛個湯頭，決定打包拎走。返到屋企自己再加咗啲菜，蘿蔔同個湯頭一齊煮 ，真係非常非常之正。最後我連啲湯都飲埋！