丼家 (已結業)

近期Yoho Mall附近新開了一間裝潢頗似西式Cafe的日本料理店，主打海鮮丼。除了海鮮丼，仲有刺身、壽司、小食同麵食，都算幾多選擇。井類都有10款選擇。我最後選擇左有十幾款刺身的究極丼，配料有三文魚、吞拿魚、油金魚、劍魚腩、帶子、左口魚裙邊、甜蝦、吞拿魚腩碎、八爪魚粒、三文魚籽、蟹籽、蟹柳同甜蛋。真係寫完我手都攰埋。個究極丼一上檯，真係好靚好澎湃。我隔離檯都睇到眼都突埋，仲好驚訝我一個女仔叫咁大個飯。佢仲即刻問侍應呢個係咪究極丼，哈哈～真係令人又妒忌又羨慕。個飯一共有兩層，上層係圓碟放左7款刺身加吞拿魚腩碎。三文魚、帶子、油金魚同甜蝦味道鮮甜而且肉質新鮮。松葉蟹鉗及劍魚腩就沒甚麼鮮味似是急凍貨，而左口魚裙邊如果用火灸處理，增加魚油香氣就更好，現在就有點膩口。而吞拿魚腩碎口感有點乾，我放左落下層的散壽司一齊食。下層是散壽司混合著三文魚粒、八爪魚粒、帶子碎、三文魚籽、蟹籽同甜蛋。雖然是碎粒，但依然鮮味十足。而且醋飯處理得不錯加上每一口都能食到海鮮，口感很滿足。原來移開上層的刺身盤就見到一小杯蕎麥麵，味道頗清新，但太遲發現，麵條有點軟掉。整體而言，究極丼是值得一試，可以一次食到十多款刺身