陳鵬鵬潮汕菜館

營業中

休息中

呢間潮汕菜館由 2016 年喺深圳創立，並於今年3月底正式登陸香港～ 餐廳曾榮獲多項大獎，包括中華鹵鵝大賽金獎、法國鵝肝大賽亞洲首獎、香港潮州菜大賽銀獎、連續4年榮登大眾點評「必吃榜」等等，想食潮汕菜嘅就唔好錯過啦！平日晚上大排長龍，有時間嘅建議早啲去攞飛，如果唔係等到天光都未入到，呢個地點呢個價錢真係冇得輸，難怪咁多人去食。一坐低就叫咗呢度嘅招牌菜，金獎潮滷拼盤包含唔同部位嘅鵝，煮至入味，新鮮肥美，配搭豐富，必點之選。私心推介香煎鯧魚，原條上，好睇又好食。肉質又肥又滑，骨唔算多，外層煎至微微脆身，魚頭最正，油脂感十足，唔覺唔覺就清晒。南澳蠔仔烙見周圍嘅客人都有點到，果然有料，炸至金黃酥脆，蠔仔大粒又肥美，而且食落唔油膩。主食有海鮮砂鍋粥，配料十足，連蝦都細心地切開左半邊方便食用，飯粒無煮到好綿所以帶點口感，湯底味道調味適中，份量好多適合多人分享。最後要埋個七樣菜，大雜燴，樣樣有少少，新鮮，鮮甜，飲埋個菜湯真係飽晒。