梅之味 (麗都大廈) (已結業)

今日喺灣仔放工又落大雨，咁就順便去灣仔食飯啦。平時成日都經過呢條街，不過好少入去食，今日終於可以試吓啦。首先叫咗個前菜，呢個豆腐係冷盤嚟，食落好開胃同埋感覺好可以送飯。睇Menu嘅時候竟然見到有酸菜魚，咁就一定要叫啦。一上枱估唔到可以咁大碗，本身以為係啲芽菜所以好似好大咁，食落先發現佢嘅魚片都真係好多，而且仲要無骨啖啖肉，越食越開胃。佢嘅湯底都好正，酸味啱啱好，有少少辣，小朋友都食得。呢個鹽酥雞都好值得一讚，睇個樣以為普普通通，咬落先知佢真係好酥。而且入面嘅雞非常嫩滑，外脆內嫩真係好正呀。食台灣嘢最緊要梗係飲珍珠奶茶啦，估唔到佢仲好飲過平時啲奶茶店。佢嘅奶味好夠，而且唔會太甜，珍珠甜甜地，好飲過啲連鎖奶茶舖啊。