影片
更多
2014-05-12
6580 瀏覽
2011年尾，黃毛小子XO仔有幸踏足有「富豪飯堂」之稱o既富臨飯店阿一鮑魚，化身成為三小時o既富豪，享用咗一頓「超強VIP 宴」，飯局o既情景至今仍歷歷在目，淨係睇返啲相都足以令細佬回味無窮 。2013年，各大報章雜誌陸續刊登有關「富豪飯堂」因租約問題而搬遷o既報導，年尾名廚阿一師傅更親自出馬，四周圍做宣傳。2014年初，2011年請客嗰位VIP Uncle專程打咗個電話比大肥爸爸，相約去富臨新舖聚餐，仲千叮萬囑要帶埋XO仔添；uncle咁有細姪心，細姪當然係要推哂同女朋友o既約會去做富豪啦 ！雖然兩個舖位同在銅鑼灣核心地段，分隔不遠，但富臨飯店新舖明顯比舊舖更為高級方便。代客泊車服務設於信和停車場口，信和中心內到處有扶手電梯，故食客無需再為行樓梯要擔憂。飯店室內裝修增添咗不少潮味，同時亦不失中國傳統色彩；正門一幅用真皮所雕琢而成o既招牌壁畫 ，及大廳中央o既阿一雕像都令肥肥家族留下咗深刻o既印象。新店比以前光鮮、整潔、衛生，室溫冷暖適中，環境寬敞舒適，格調亦較以前高雅，更有富豪feel 。據悉，新舖面積比舊舖大，樓面亦較高，可容納約二百多位客人。餐廳一樓設有散座及八間大
雖然兩個舖位同在銅鑼灣核心地段，分隔不遠，但富臨飯店新舖明顯比舊舖更為高級方便。代客泊車服務設於信和停車場口，信和中心內到處有扶手電梯，故食客無需再為行樓梯要擔憂。飯店室內裝修增添咗不少潮味，同時亦不失中國傳統色彩；正門一幅用真皮所雕琢而成o既招牌壁畫 ，及大廳中央o既阿一雕像都令肥肥家族留下咗深刻o既印象。
新店比以前光鮮、整潔、衛生，室溫冷暖適中，環境寬敞舒適，格調亦較以前高雅，更有富豪feel 。據悉，新舖面積比舊舖大，樓面亦較高，可容納約二百多位客人。餐廳一樓設有散座及八間大小不一o既廂房，二樓則打通成為一間附有獨立洗手間及卡拉OK設備o既高級廂房，最多可招呼24人或3圍。所有廂房都有最低消費限制，約$1,900/人 ，其餘開瓶費為每枝$200，冇切餅費。礙於大廳內有多位富豪客人正在進食，為免引起佢地不滿，小肥最終未有拍下飯店室內環境之照片，敬請原諒。新舖大咗，人手亦相對地增加咗，當中最搶眼就係幾位高大威猛o既G4男 ，各人帶住一部耳機，原來佢地係經理，唔講真係以為佢地係富豪們o既保鑣呀！其實廳內o既姐姐仔們每人都有帶耳機，不過可能佢地身材冇咁突出，所以就冇G4男嗰種氣勢。G4經理及其他伙計們都好友善，除咗為我地上餸、斟酒、換碟，面對住問題青年小肥o既多個疑問，佢地都好樂意一一解答 。
VIP Uncle請客，每次都會悉心安排，預先訂下菜單，客人只需準時出席，飯來張口 。
密煎四十六頭吉品鮑：第一道先上主角「阿一鮑魚」，每人兩隻，意味着一雙一對，好事成雙！「阿一鮑魚」軟腍中帶點彈牙，淨點豉油食，已經品嚐得到鮑魚o既鮮甜味，簡單啲講句，水準依舊高超！
豉油皇海中蝦：海中蝦蝦身爽脆，鮮味濃郁，配上帶甜o既豉油真係非常美味！
官燕燒釀雞翼：糯米釀雞翼就食過，用官燕黎釀都係第一次聽、第一次見、第一次食！脹卜卜o既雞翼外表光澤油亮，第一口已覺皮薄香脆，毫無肥膏，再食內層o既官燕同雞肉更覺香滑幼嫩；雞翼「清麗脫俗」，健康又美味，真係非常出色 ！
西洋菜陳腎生魚煲豬踭湯：煲湯好足料，西洋菜同陳腎o既味道都好濃郁，相中可見，湯渣好似山咁高，當中陳腎最少有兩層 。西洋菜鮮嫩，大肥同姨媽最為欣賞，夾完再夾，結果一條都冇得剩！媽咪就大讚啲陳腎靚，味濃得可以煲都兩次湯；主人家真係客氣，見媽咪對啲陳腎咁感興趣就立刻安排打包哂比我地拎走，媽咪第日再用黎煲湯，啲湯真係仲咁入味 ！
鮑汁花菰扣鵝掌（伴唐生菜）：鵝掌質感軟腍滑溜，唐生菜清脆，厚厚o既花菰夠腍得黎帶點爽，菰味清香，鮑汁味道香濃而不膩，簡真係無懈可擊呀！
阿一生煎東星斑：VIP Uncle再三強調，東星斑係原條煎，係阿一師傅o既招牌菜式，第二度食唔到咁靚。東星斑雖然係每份分好先上，但入口時亦無減魚肉之熱度，煎製o既魚肉幼嫩軟滑，配上豉油皇食，絕對可以同蒸魚比美。此外，魚皮超級香脆，係細佬食過最正o既中式魚皮 ，大家千奇咪走寶！
燒汁焗牛尾：大大件o既牛尾骨膠原豐富，喺舊骨度其實藏咗好多肉，肉質鬆軟，而且肉汁好夠，所以啲肉好夠濕潤，一啲都唔嚡，燒汁香滑，就連伴碟o既薯仔都好入味。
粉絲肉蟹煲：粉絲肉蟹煲一共兩煲，每煲都有一隻好大o既蟹，震撼到小肥唔記得影相 。蟹皇雙妹嘜姨媽同媽咪話啲蟹肉鮮甜無比，香嫩幼細，睇見佢地食得津津有味都知隻蟹有幾掂！XO仔唔食得蟹，不過淨係食粉絲都覺得好滿足，事關煲內o既粉絲夠熱夠乾身，而且香口野味，食咗咁多味餸菜後，小弟都可以一個人食四大碗 ，美味程度不言而喻。蓮子燉白合糖水：糖水清甜滋潤，白合薄脆，當中以龍眼肉最為甜美。
美點雙輝之煎推：煎推好大粒，皮薄鬆化唔油膩，三款甜品中最正o既一味 ！
美點雙輝之馬拉糕：馬拉糕清甜鬆軟，大肥like爆！
記得兩年多次VIP Uncle喺富臨舊舖請客，小肥對「富豪飯堂」o既食物已經係讚不絕口，唯獨因室內無電梯及洗手間設備不足而扣咗飯店兩分。今次光臨富臨新舖，除咗可以再一次親嚐高質美饌，小弟對其更為高級、更加親民o既環境，及其友善o既G4經理最為印象深刻，頓時覺得富臨明顯地「升咗呢」 。Uncle宴客，XO仔唔洗比錢就一定覺得好抵食，不過唔知等自己真係成為富豪後，要自掏腰包時又會點諗呢？！
張貼
