裕滿人家 (已結業)

由於今日係舅公嘅生日，所以我們選擇咗喺舅公屋企附近慈雲山中心嘅「裕滿人家」飲下午茶同食晚飯！我們叫咗斗門鮮蝦餃、鮮蝦菜苗餃、鮮肉香茜餃、旋風流沙芋茸包、香滑合桃包、川芎白芷燉魚雲、藥膳浸鷄腳、蠔皇叉燒包、鷄絲蒸粉卷同出水芙蓉帶子飯！斗門鮮蝦餃嘅餃皮好煙煙韌韌，蝦肉好爽甜彈牙！鮮蝦菜苗餃同鮮肉香茜餃嘅餃皮都幾晶瑩剔透，餡料相當惹味！旋風流沙芋茸包嘅包質好香滑鬆軟，芋茸相當流沙，味道好香甜！香滑合桃包嘅賣相超級精緻吸引，好似一粒真嘅合桃咁，入面真係有粒粒合桃，味道極之香甜，口感非常豐富，真係超好味呀，係本人嘅必食推介！川芎白芷燉魚雲嘅魚雲好新鮮，肉質好嫩滑，味道好鮮甜！藥膳浸鷄腳嘅湯底好香濃，鷄腳好軟滑同入味！出水芙蓉帶子飯嘅賣相好吸引，材料非常豐富，炒飯亦炒得好乾身！