富來紫砂飯店 (已結業)

星期日去左深水埗搵食,見到間富來紫砂飯店裝修特別,加上天氣炎熱,唔想係大排檔食到汗流浹背,所以決定一試!入到去裝修好中國feel,環境十分企理,由於第一次黎,所以叫侍應介紹有咩好食,佢極力推介左個新出的蒜蓉原隻蟹焗煲仔飯,剩係聽到個名都想試啦,何況我係一個蟹痴,另外叫左個京烤骨(招牌之一),由於2個人唔係食到太多野,所以叫左個海鮮雜菜煲就算!!!等左一陣,我最期待的蟹煲仔飯終於出場,一開蓋已經聞到好香既蒜蓉味,見到成隻蟹放係入面,個蟹蓋有好多膏,本身我唔係咁鍾意食膏蟹,因為覺得d膏好硬同好"鞋",但係佢地既膏好香好軟,配埋d煲仔飯一切食,簡直係人間極品,之後再食埋d蟹肉,都好好食,好甜...仲之一個字“正”!!! 至於京烤骨賣相非常好睇,酸酸地甜甜地,d肉又夠淋,非常送飯,所以除左個蟹既煲仔飯,我地2條友都每人叫左2碗白飯,而個雜菜煲就不過不失,份量足!!Anyway,食完好滿足埋單都係2百幾蚊,超抵!!!個經理仲話我陸續會有好多不同既煲仔飯會上牌,叫我地多d黎幫襯...唔駛佢講食完個蟹飯我都肯定會再番叮lor!!!我諗冬天黎食一定會更加滋味lor.....