森港客家菜

營業中

休息中

大份、抵食、仲要好新鮮！話說今次係屋苑業主立案法團攪活動慶中秋，價錢相當優惠！4人份量，完全夠6個人食。5點左右係樓下拎食物，放係雪櫃到7點先開始食，居然d細蜆仲識郁！點解咁嘅價錢都可以咁高質？！唔係講笑，豬紅夠滑又入味、牛栢葉滾耐左都唔覺靭、青口唔鞋，肉質夠嫩（不是急凍貨）、蝦彈牙唔會霉、生菜青BB、 丸都有4種：貢丸、牛丸、芝士丸、蟹柳丸，腸都居然有齊廚師腸同脆皮腸…仲有粟米、南瓜、冬瓜、金菇、響鈴、魷魚…我淨係夾返d食唔晒嘅食物落保鮮袋都夾到我手軟！仲有個雞煲，d雞肉唔鞋，好多件都係滑嘅。個人黎講比較喜歡佢重慶辣雞煲，不過奇味雞煲都唔錯。成個屋苑，經歷左唔少事，今日見到好多隔離鄰舍上上落落拎住一大袋食材返屋企，好有過節氣氛👏🏻好多人都好開心啊，尤其是d長者。咁平就可以買到咁高質、咁多份量嘅食物過節。完全只要開個爐、拎d碗筷出黎就可以開餐，超級正！連豉油、蔥、芫茜、金銀蒜都pack埋比你。真係食得出間舖係用心對待食客/街坊！我嚴重懷疑老闆同樓下d海鮮檔、凍肉舖關係好好，所以可以入到咁新鮮嘅食材！就算下次屋苑冇攪活動，我地都會去買佢外賣火鍋料或直接去幫趁！