金田家 (已結業)

呢間拉麵店唔大，有d 似傳統果d 大家圍住廚房排排坐然後廚師即叫即整既果隻，不過呢度光鮮得多。拉麵主要既配菜係either 腩肉叉燒或者黑豚叉燒，因為我想試佢個松露醬，所以叫左個黑松露拉麵，會跟黑豚叉燒。點菜紙可以選擇硬度，叫左硬，食落比一個煮左三分鐘既即食麵略為再raw 一d。平時煮麵我都鍾意淨係煮兩分半鐘，貪佢唔好腍得咁快，所以我覺得呢個硬度幾適合我。d 松露醬真係好香唔講得笑，個麵未送到黎遠處都聞到，而且香味可以維持好耐，力久不散。d 醬微凍，應該係雪櫃新鮮滭出黎，口感為濃縮左好多倍既菇菌精華，味道唔太鹹。黑豚肉屬於肩膀既部份，脂肪比例少，相對會較乾身。但係餐廳巧妙咁利用薄切原理，增加到d 肉吸收到湯汁既表面積，加上非常奶滑濃厚既豚骨湯底，浸兩浸後就會沾滿油光好易入口。食得拉麵又點可以唔叫溏心蛋呢？呢度既溏心蛋要另外加，但係絕對超值，佢個texture 十分之分明，而且仲係調過味，少少鹹亦帶少少甜，惹味之選～最後叫左枝綠茶，係伊藤園既出品。冰凍得黎夠晒解喝，以茶去一去飲完d 湯既油膩岩岩好。