品越越式料理 (雅蘭中心) (已結業)

是日去旺角上完堂，去雅蘭途中仲諗緊去邊到食越南野，一抬頭就見到品越，一於試試佢！原來品越唔係普通越南野咁簡單，應該係加左少少fusion成份，感覺有啲新奇！中意試新野既朋友，就即刻叫個燒呑拿魚伴青芒果青木瓜沙律試試功架，而我就比較穩陣，叫番平時食越南野會叫嘅：牛油雞翼！飲椰汁！食串燒！講講我最中意嘅牛油雞翼先，一客有4隻，每隻雞翼上都包住一層脆漿皮，又唔算好厚（個人喜歡食脆漿皮），一啖咬落已經食到勁香牛油味，肉質嫩滑，好似好少炸到咁脆都仲可以保持呢個水準，同埋佢啲雞翼size都幾肥大，啖啖肉感覺好爽！一人食得兩隻係完全唔夠㗎！而燒呑拿魚伴青芒果青木瓜沙律，我都幾中意佢個燒呑拿魚，外面少少熟，上面有千島醬同新鮮柚子肉，一嘢放哂落口，既食到呑拿魚肉嘅鮮味，千島醬令魚油無咁油膩，新鮮柚子肉好清新，酸甜味令胃口大開，忍唔住一舊接一舊。而隔離嘅青木瓜沙律份量雖然好似好少，但以前菜黎講真係啱啱好，吃得太多又怕食唔落之後嘅嘢。最後我地兩個女仔仲叫多個芒果黑糯米飯！香濃椰汁配埋黑糯米，食完超滿足啊！