南記粉麵 (渣華道)

營業中

休息中

廿年前係因為南記而開始愛上酸辣小窩米線。嗰陣時都未有譚仔，其他米線鋪仲未大行其道。之後因為南記質素下降左，啲湯淡左，而又有其他選擇所以冇食南記好幾年。呢日去開北角又見有南記，所以買左碗麻酸辣春卷小窩米線加大腸。外賣冇講明都已經幫我米線同湯分開裝，好細心。試過其他米線舖先知道酸辣米線（甚至小窩米線）都唔一定有韮菜，酸菜同腐竹。而今次再試南記小窩米線覺得佢回復番我最初食時嘅水準。湯底唔水，厚身，酸味適中可以話係小小偏甜，但啱我，好好味。冇另加但都有唔少酸菜，甜甜酸酸，少量芽菜，韮菜，肉碎，同埋見到有腐竹！好感動！真係唔可以take for granted! 喺關注組學左點叫先會跟四條春卷😎 春卷依舊好野味。大腸就比較有個性， 一開始只見到大腸碎，仲以為佢唔記得俾我🙈之後見到兩塊好長好似冇切嘅大腸😅好味道，但比較薄身。啲米線就比較淋，唔係爽口嗰種，但外賣嚟講都可以接受。