新明華苑快餐店

營業中

休息中

今日去紅磡新圍街食晏。。呢間快餐店縮在內街唔起眼，但炒嘢同午餐都有街坊捧場，不過就唔開夜晚同星期日。該店的即食麵，除公仔麵同一丁麵外，仲有福麵，辛辣麵同營多印尼撈麵揀。炒嘢我就特別欣賞佢哋嘅星洲米，炒得好惹味有鑊氣又好夠料。不過今日虛火又起，牙肉又痛，唔係好敢食星洲炒米，見到午餐有揚州炒飯，橫豎未試過響呢間食飯，連例湯加凍飲只係$39，街坊價錢，一於試試。個例湯係霸王花瘦肉，煲得好靚好濃，唔係一般肉骨頭味精水。個炒飯都好足料，蝦仁幾多，仲有菜粒葱粒火腿粒叉燒粒蛋花，飯當然唔係金鑲銀，但炒得乾身有咬口。咁嘅價錢，咁嘅水準，剩係飲碗靚例湯，都已經值得推薦。