翠屏茶餐廳

營業中

休息中

睇返記錄，原來嚟呢間舖頭食嘢，只不過係約一個月前嘅事，當時三餸車仔麵配熱飲係$39，但今次嚟已經加咗$1，去到$40啦！記得上次話佢哋有檬粉同銀針粉可供選擇，但實情係點？呢日嚟到，話要檬粉，個店員話睇吓先，先幫我寫住銀針粉，結果嚟到真係銀針粉，而唔係檬粉，不過都ok，車仔麵配銀針粉其實都好少見，所以唔係咩大問題。三餸我就揀咗大腸、牛筋，同埋豬皮，呢三樣比較濃味嘅食物，再配一杯熱奶茶。大腸係正路嘅雪貨，腍身得嚟少咗啲煙韌，更無鮮貨嘅香味，話時話，依家起出面食豬大腸，都幾難食到鮮貨。牛筋又係一定係雪貨，腍得嚟帶啲爽口，而且夠入味，唔錯。豬皮都叫有啲厚度而且爽口，而唔係薄薄嘅油炸豬皮，嗰隻我買過一次，永遠唔會買第二次。奶茶同銀針粉就正正常常，無咩特別。總括嚟講，呢餐算係普普通通，勝在試下銀針粉配車仔麵會唔會有啲火花出嚟，答案顯而易見係無。