花椒子 (已結業)

今晚去咗一間位於旺角嘅打邊爐餐廳，裝修非常之有特色，完全好似置身喺太空打邊爐咁。首先我哋嗌咗個鴛鴦湯底，分別係花膠雞湯同酸菜白肉湯底。絕無誇張，佢係半隻雞成個放落個湯底度，花膠亦都非常之彈牙，吸晒雞湯嘅精華，好濃郁嘅湯底真係好滋味。另一邊係酸菜白肉湯底，酸度啱啱好，亦都非常之多肉，好抵食。牛小排牛味非常之濃郁，亦都入口即溶，三色丸仲要係自己手打嘅，分別係墨魚丸，豬肉梅菜丸同埋蝦丸，睇得出呢間餐廳係有心思嘅。海鮮方面亦都非常之有驚喜，佢完全唔係雪藏海鮮，放落個花膠雞湯度將個湯底升華咗， 呢度竟然係可以食到龍躉魚片，鮑魚，帆立貝廣島蠔，全部都係貴價食材。除此之外呢度嘅侍應生都好有禮貌，會為你定時定候加湯底，同埋呢度嘅服務水準一流，用心服務先會食得開心。最後我哋先落蔬菜，啲蔬菜吸收晒雞同海鮮嘅精華，除咗鮮上加鮮之外，最後落埋個烏冬落去今餐真係非常之滿足。