好包 (已結業)

上星期落雨落足甘多日，星期六晏就見有太陽就揸車去遊車河尋找好野食😋 好包就係第一站！呢到唔近地鐵站，地點亦較為難搵，如果唔揸車就要撘輕鐵或巴士再落車開google map搵點行。同埋注意好包係無枱無得堂食的。門面設計都幾精緻。見到有唔少雜誌之前都有推介過好包。食物款式唔算多，只有六款包同兩款飯選擇。飲品主要以健康蜂蜜飲品為主。如果試過蜂蜜飲品覺得好飲，仲可以買濃縮版番屋企自己沖。終於黎到主角好包，揀左一號椒鹽味，配料生菜同青瓜唔算多，個包烘得頗脆口，雞翼亦餣得好入味同炸得好脆，雞肉好嫩。整體咬落去味道都幾夾。我地仲試左2號蜂蜜味，個人認為比椒鹽味好食，雞翼既蜂蜜沾到脆卜卜的包內，一口咬下去整體味道配合得很好，而且無甘熱氣。買包加$8就可以換一枝蜂蜜飲品，呢枝洛神花蜜唔會太甜，酸酸地頗開胃的亦好解渴。