中華小廚

營業中

休息中

俾人捉住開會，開到過晒lunch time，為免餓到頭暈，唔理三七二十一出去食個tea先。行到黃埔，本來諗住食個大x樂茶餐，點知突然間好想飲杯好味嘅奶茶，慰勞下自己，所以去咗大x樂隔離嘅中華小廚，睇下有咩抵食下午茶。講到尾都係奶茶先係王道。坐低咗諗住嗌個下午茶，諗諗下都係想食個飯，結果叫咗咖哩牛腩飯，叫做平過lunch time嚟食少少。餐飲當然係最想飲嘅凍奶茶少甜啦。雖然個飯係下午茶餐，但係牛腩仍然足料，有筋又有腩，咖哩汁有少少辣，正宗港式咖哩嘅味道。凍奶茶算係唔錯 ，不過同區附近有更好嘅凍奶茶，詳情可以睇我另一篇食評。一個飯連凍飲41蚊下午茶嚟講唔算好抵，但能夠喺呢個鐘數食到一碗碟頭飯，對於作為打工仔嘅我已經係一個賞賜。