年香園

營業中

休息中

終於可以去到鯉魚門，依個位真係好吊腳，不過今次唔係食海鮮，而係去行山。本來諗住去完石礦場之後就上魔鬼山。但係你之前search過吓有啲咩嘢食，就見到有幾間老餅家。又唔想買完之後拎住行山，最後都係冇上魔鬼山，破完林之後返番落嚟買。落到嚟嘅時候已經17:00，實在有啲餓。呢一檔本身都係目標想買雞仔餅，點知佢有其他嘢可以自己拮黎食。咁就試吓佢啲肉乾，豬肉乾有啲爽，不過我最鍾意啲刺激少少，就係個香辣牛肉乾，個種辣唔係麻辣，好似浸過啲潮式辣椒油再燒，辣得來係幾過癮。我覺得好食過澳門嗰啲肉乾。跟住又食埋佢款合桃，唔太甜亦都好香。另外款雞仔餅，唔會有肥豬肉，但有少少南乳嘅香味。如果唔鍾意食太濃嘅朋友，呢個係一個唔錯嘅選擇。最後買咗呢三樣嘢返屋企俾爸媽試。