世華餐廳 (已結業)

尖沙咀寶勒巷與赫德道一帶近年開多咗食肆，到夜晚依然燈火通明仲熱鬧過日間，有晚路經此處正在煩惱食乜嘢好？突然望到世華蝦嘅招牌，見咁耐無嚟又走上嚟睇吓，發覺裝修過後都算乾淨企理，咁就坐低食番個港式西餐。雖然位處尖沙咀心臟地帶但價錢就走中下價路線，五、六十蚊就有扒鋸都咪話唔抵食。叫咗個雙併晚餐，T骨扒配田螺（$55）同馬來大餐（$60）。晚餐個粟米忌廉湯夠杰但味不濃，好彩個餐包都叮番熱，田螺有4粒，味道好普通，T骨扒就好大塊，完全無俾梳打粉折磨過仲有D肉味，抵讚。至於個馬來大餐都幾多嘢食，個咖喱湯都幾辣似係將D咖喱汁溝稀但都幾好飲，有4串沙嗲，燒得幾好雞肉唔會乾，個沙嗲汁都算正，比起好多星馬泰餐廳都好食，咖喱羊扒就得幾塊但味道唔錯，最後仲有雪糕，十分抵食。番屋企上OR睇吓，唔明點解咁多喊面？其實以呢個價錢有咁嘅水準都唔係咁差啫。