大隻佬麵家 (已結業)

收工即走又趕唔切返拳，過晒鐘，是但食個麵返歸。上次食過大隻佬好好味，今次試吓其他野先。豪情金莎撈麵？我估係蝦籽撈麵掛，哈哈！下次先試您。西洋菜、清湯、牛腩撈粗到齊，一家團聚，可以慢慢嘆喇。白灼西洋菜，甚少麵檔有西洋菜供應架喎，可能因為難洗又易爛掛，就您啦。西洋菜勁爽嫩多汁又鮮甜，非常難得，高質喎！大多食店只有又老又韌又粗糙既西洋菜。牛腩撈粗走蔥走蔥，叫左兩次走蔥落單阿姐都聽唔到，魂遊太虛！搞到送貨阿姐要行多轉，話訂無寫走蔥，唔該晒。撈麵只比腩汁幾滴，點夠撈成碟麵呀？好淺口呢，好采有美味辣椒油代替啫。牛腩入味鬆化無渣，唔肥無羶味，非常滿意，只係有點凍囉。粗麵滑溜彈牙帶蛋香，烚麵既功力非常厚！但因腩汁太少實在淡口，好采無味救星到！自家辣椒油，我當然係勁撈淨辣椒渣啦，辣味澎湃加上散發出陣陣酒香，好味又特別。飲啖清湯降降溫先，幾好味喎，成碗清湯飲晒，之後渴死左！上次位阿姐好落力推介產品，仲建議加錢用招牌豉油皇撈麵添。但今次依位阿姐斯文有禮但粒聲唔出，掙左少少。晚飯時間七點幾勁少食客喎，計埋我得兩枱乍，靜靜地嘆美食我最鍾意，哈哈。