爽爽麵店 (已搬遷) 新店位置

身為港島人，過去元朗一日遊，當然要做定資料搜尋，openrice下有咩食，呢間爽爽麵店竟然有不少好評，於是就去一試。一間小小街坊式麵店要做到出名，令人特登尋上門去食，仲要拍曬隊，自不然有返兩道拿手菜。見其他人推介的都係醉雞同豬扒，就淨係試左呢兩種配料的粉麵河。和朋友點左三碗，總之有試豬扒又有試醉雞啦。醉雞有分新鮮雞同冰鮮雞，相差＄15，我地去到新鮮雞已經賣曬，不過本來都只想食冰鮮雞，所以無所謂。醉雞係同麵分開上的，雞浸在湯裡，有8，9件，算好多。我地點的醉雞，一碗比較靚，帶雞皮，有光澤，看起來比較新鮮同吸引，另一碗d雞甩左皮，賣相即刻大扣分。味道上，冰鮮雞其實都已經都嫩滑，雖然無試到新鮮雞，講真唔覺得我會食得出大分別。酒味幾香，而且夠入味，呢道醉雞可以話就係成間店ge鎮店之寶。至於豬扒，其實比較似食大件ge叉燒肉，仲係好瘦嗰隻，有D乾，一定唔係平時食ge日式的豬扒，可能有人覺得特別，但係我個人唔太接受。飲品推介菊花茶，飲得出真係煲出來ge菊花茶，菊花味清香，唔苦，亦唔太甜。凍菊花茶夏天飲清熱解暑。