八沢 (已結業)

近排極度繁忙，OT O到咀都O埋，難得今晚可以早少少走人，正所謂搞掂食碗麵，今晚一於捉埋同事過去上環嘆返碗日式拉麵。 八沢主打新派日本拉麵，拉麵選擇好多，淨係拉麵烏冬都已經有差唔多二十款，而且每款拉麵烏冬既用料都幾多元化，今晚我地就食左黑松露忌廉海鮮烏冬同埋黑蒜炙燒極濃黑豚肉拉麵。 黑松露忌廉海鮮烏冬。一上枱已經散發出香濃既黑松露味，雖然黑松露香味好強，但係並非所有嘅焦點，因為湯底係用左忌廉，兩者係幾配合既，再加上海鮮既鮮味，烏冬既牽煙韌，無論口感，味蕾，甚至嗅覺都能夠滿足得到。 黑蒜炙燒極濃黑豚肉拉麵。另一款拉麵都係濃味之選，黑蒜帶甜味，有一抹蒜油鋪喺面頭，以鐵煲上枱出煙熱辣辣，拉麵有蛋味又彈牙，黑豚肉厚切有嚼勁，配上青蔥同熟蒜非常惹味。串燒最低消費叫兩串，燒鱔好肥美，魚皮焦脆。燒牛舌同平常的不同，並非全熟，咬下去較嫩和淋身，調味不錯👍。