巴蜀烤全魚 (已搬遷) 新店位置

以前就有聽過呢間餐廳名不過未試過，知道佢最近重開返就決定同個好鐘意食魚煲既朋友去試下。佢地專做鯇魚，店員推介我地食小邊全魚小辣，即係兩份冇骨既小邊砌埋。另外加左鮮枝竹同蓮藕，仲有份雞全翼小食。上枱望落賣相好好，份量亦比預期多。不過魚肉入口唔滑，仲Hi烚烚，小辣亦唔麻唔辣，滾多10分鐘左右鹹度更以幾何級數增長，平均一啖仔魚要食4份1個飯先解到鹹。要形容味道除左鹹就係鹹，冇其他味。食到一半，我同朋友係食而無味棄之可惜既情況下決定埋單走人，不作無謂堅持。佢地用既爐設計差係導致唔好食既好大原因，簡單解構就係爐下面隨意擺放2個可移動燭台，局部地區受熱，成盤魚火候溫度唔平均又點會好食？仲要好容易癡底煮濃。總括係失望既。