榮光粉麵小廚

營業中

休息中

今日約咗住北區個朋友食晚飯，朋友介紹一間粉麵小廚。榮光粉麵小廚，位於上水龍琛路34號地舖，即上水滙商場側邊，餐廳除了小菜晚飯亦有麵檔供應中式粉麵，有多張卡位及圓枱方便不同人須要。金牌牛三寶，見到麵檔就忍唔住叫咗，有牛腩、牛筋、金錢肚，炆得好入味。牛腩好稔冇黐牙，牛筋同金錢肚都啱啱好，稔得嚟保持彈性。西蘭花蝦球鮮魷，🍤蝦球魷魚先走油保持鮮味爽脆，西蘭花翠綠蒜蓉炒香，火候十足。金沙蝦球🍤，爽脆嘅大虎蝦球油炸，加上咸蛋黃翻炒，外皮脆卜卜，咸蛋黃好香好乾身，墊底嘅脆米粉都好脆。花膠雞煲翅湯，有花膠、魚翅、雞腳，濃郁與清甜之間，飲落好滑好潤。見隔離枱嘅鎮店小炒皇同金薯蜜椒牛柳粒，好香好有鑊氣，想叫又食唔落，唯有約朋友下次再臨。