天膳

營業中

休息中

今個禮拜餐廳週差唔多都係食西餐，尋晚training冇飯食，今朝食咗個麥當勞通粉早餐補番都未夠。Lunch原本想去飯堂“千里禪”搵希師傅，不過佢放假，於是同靚女C揀咗有口碑嘅“天膳”試新嘢。當日有鰤魚，即野生油甘，平時養殖油甘6公斤左右，野生嘅再大條啲。要咗三文魚子、海膽、赤貝、帶子、鰤魚、左口魚、中拖羅、小拖羅、鰻魚、冬瓜蓉卷。刺身普遍質素不俗，赤貝嘅wasabi略多，肉亦唔夠肥厚；鰤魚冇預期中極肥美，可能已過當造期吧，但肥美程度有啲錯覺似食拖羅，幾驚喜；左口魚又係唔小心當成裙邊叫錯，但居然出奇地爽鮮；拖羅冇渣都幾肥；鰻魚外皮脆裡面軟熟，與“鮨真”可比拼一下，但後者用海鰻略高一班；冬瓜蓉略甜，但已比其他店水準高；試了C的牛蒡卷，太鹹了。蒸蛋幾有蛋味，麵豉湯落咗好多京葱幾香。記起“鮨真”負責熟食的師傅來自這裡，怪不得這裡熟食水準偏高。但紅豆雪糕好似細個食嘅雪山咁，冇乜香甜味麻麻。整個壽司定食10件$190，性價比高。