明道

營業中

休息中

今日同朋友去咗銅鑼灣希慎附近嘅亨利中心一間叫「明道」嘅日式餐廳食午市定食，餐廳嘅裝修簡約新淨，一入到去俾人一種舒服嘅感覺，有吧枱位同普通座位。我哋嗌咗汁燒活鰻魚飯同銀鱈魚西京燒配飯，每個定食套餐都會配有茶碗蒸、麵豉湯同咖啡或海鹽雪糕。茶碗蒸嘅蒸蛋嫩滑，入面有冬菇、雞肉、白果等配料；活鰻魚飯可以揀鹽燒或汁燒，我哋揀咗汁燒而個醬汁唔會太甜，呢間嘅鰻魚肉唔係超肥美嗰隻，而係燒得比較乾身但咬落去有口感嗰隻燒鰻魚，食落去感受到燒鰻魚嘅炭香同魚油香，而且魚身唔多魚骨，鰻魚皮燒到好脆，珍珠飯撈埋燒汁同紫菜好夾；銀鱈魚西京燒有兩塊銀鱈魚配一碗白飯，魚身煎到好香，魚肉結實用筷子夾落去唔易散開，兩塊魚肉完全冇魚骨，配上西京燒嘅汁同沙律醬令到食落去甜甜地，旁邊有一堆沙律菜，可以平衡番魚油嘅油膩感；麵豉湯濃郁得來唔會太鹹；定食套餐可以選擇飯後跟一杯咖啡或雪糕，咖啡充滿豆香，口感順滑，海鹽雪糕鹹鹹地，可以中和成餐飯嘅油膩感，清一清口腔入面剩低嘅魚油味。📍銅鑼灣恩平道42號亨利中心7樓位置就腳：🍊🍊🍊🍊🍊餐廳環境：🍊🍊🍊🍊🍊食物味道：🍊🍊🍊🍊🍊整體CP值：🍊🍊🍊🍊🍊