Hugo Le Resto Grill (已結業)

今日到開業兩星期的新餐廳試菜， 餐廳以semi buffet形式運作， 沙律吧同湯自己攞， 仲有main course同埋餐飲， 在銅鑼灣真係唔多。 沙律吧方面好有心思， 除咗有沙律菜、菠蘿、車厘茄、青瓜呢啲生嘅蔬菜之外， 仲有三款整好咗嘅沙律， 其中蘋果雞肉沙律好清新， 用咗青、紅兩款蘋果混合處理，豐富咗成個沙律嘅味道。 側邊仲有唔同嘅醬汁、 麵包粒、煙肉粒同埋芝士粉，真係好有💛。今晚餐湯係龍蝦湯，香濃，有陣陣龍蝦味，濃淡適中。好味🖒主菜方面，小編推介牛腹肉扒，外面香脆，內面肉質鮮嫩，比起連鎖式牛扒屋選材更有心思， 鍾意食牛扒嘅朋友值得一試。另外一款推介係銀雪魚扒， 賣相以為好燶好乾身，點知食落魚皮脆卜卜，魚肉好滑好鮮味， 完全唔需要點任何醬汁，火喉控制一流。整體嚟講餐廳花好多心思設計菜式，同埋選材認真， 三五知己開支酒，傾吓計， 不妨試下呢間新開嘅樓上餐廳。