La Moo Moo' s Steak and Fries

營業中

休息中

銅鑼灣有好多樓上餐廳，如果唔識路都好難搵到，不過如果識路嘅話就有如 hidden gem。今日去嘅係一間環境氣氛都好好嘅扒房 ，又有無限任添嘅薯條 ，非常值得推介。我同朋友去到每人叫咗一個套餐，有湯、沙律、包同主食。當晚餐湯係忌廉湯，creamy 得嚟唔會太過heavy。沙律有溏心蛋同麵包碎，食落口感豐富，配合埋芝士粉同少少千島醬，作為前菜非常適合。然後嚟嘅係餐前麵包，雖然睇落普通，但係特別之處就係餐廳個肉桂醬，其實我平時好少食肉桂 ，不過呢個肉桂醬清清甜甜之餘有淡淡的肉桂味，配麵包食一流。然後嚟嘅係意大利黑松露忌廉意粉，濃厚嘅黑松露配合毫不吝嗇嘅芝士粉，一放低已經聞到陣陣香味，令人食指大動。Steakhouse 重點當然係牛扒啦，我哋當晚叫咗一個10安士嘅紐西蘭肉眼扒，牛扒煎到啱啱好，外面有少少炭嘅焦香味，入面就仍然都係粉紅色 ，食落仍然嫩口。薯條偏幼身，所以炸得非常香口，食完再encore左一筒。