西餐大排檔 (已結業)

雖然銅鑼灣都有好多西餐，但係要有一間好食價錢又大眾化嘅都唔容易。 好彩朋友介紹咗我一間西餐大排檔，佢好近銅鑼灣地鐵站， 地點夠曬方便。因為近排都幾熱，所以一嚟就叫咗杯紅豆冰，佢上面有好多cream，個賣相都已經好吸引，唔似一般茶餐廳咁 ，又多冰，上面又冇cream，見到都唔想飲。 但呢杯紅豆冰啲紅豆好大粒， 椰汁紅豆同埋忌廉分佈都非常平均， 絕對唔係一般普通嘅紅豆冰。 另外前菜我哋叫咗燒生蠔， 隻生蠔燒到半生半熟，食落去非常滑 。加上上面有芝士，味道啱啱好 ，以為食完隻生蠔冇啦，點知原來生蠔下面會有紫薯蓉 ，非常 surprise ，因為好少見有燒生蠔會配埋紫薯蓉 。都主菜喇，我哋叫咗個燒美國雞扒配鮑魚， 上面係松露白汁，估唔到個汁同雞扒係咁夾，可能因為自己好鍾意食呢個汁啦。 最重要係竟然配埋鮑魚，呢個配搭非常之新鮮，第一次咁樣食 。雖然今次叫嘅嘢食唔多，但每一樣我哋都好滿意，希望下次再嚟試多啲嘢食啦。