鳥森 (已結業)

我今日去左銅鑼灣，去到一間朋友讚過嘅樓上雞串燒餐廳，果然冇介紹錯！我同朋友各自叫咗鳥森串燒五本同精選串燒六本。串燒就share食，所以試到好多唔同口味。每份餐都有附送雞出汁、茶碗蒸、漬物、沙律、御飯同熱飲，而我同朋友就揀咗咖啡。漬物酸酸地，開胃又爽口。蕃茄沙律上面有蒜蓉，辣辣地好惹味。茶碗蒸嘅蛋好滑，入面仲又有雞肉。御飯有蛋黃同紫菜，風味獨特，撈埋食份外滋味。咖啡有炭燒味，調味用嘅奶滑得嚟唔會膩。雞出汁聞到好濃沃嘅雞香。串燒方面，茄子多汁，上面有明太子調味。牛橫隔肌好軟熟，但又有咬口，口感平衡得好好。免治雞肉棒，好好肉地，外面燒到焦香但唔油膩。紫蘇里芋豚肉卷，上面搽咗甜甜酸酸嘅梅醬，一層豚肉喺外面包住好脆口。黑豚豬腩串，油脂豐富，外層燒到有啲酥皮嘅質感。雞胸軟骨，平時好少見燒軟骨，保留到香脆但冇炸雞軟骨咁邪惡。冬菇好juicy。雞腿肉同雞翼，啖啖肉，連埋雞皮燒更加香口。整體黎講，呢間餐廳食物質素好高，串燒亦都幾有特色，絕對係銅鑼灣鬧市嘅hidden gem。