牛之鍋

營業中

休息中

同事啱啱介紹我呢一間位於銅鑼灣鵝頸橋附近嘅任食刺身火鍋店，晚市任食最平都只係百零蚊，今晚喺附近收工，又過嚟試下。一出閘梗係整番個刺身先，刺身嘅選擇雖然唔多，但係有番咁上下質素，帶子鮮甜，鮮蝦彈牙。花之戀，特別鍾意佢呢度啲壽司飯比起坊間一般嘅細舊好多，三文魚同嚿壽司飯嘅比例係2比1，咁個胃就有更多空間可以食接著嘅美食。涼拌麻辣魚皮，涼拌汁味道酸酸甜甜，仲有少少嘅麻辣味道，加上爽脆嘅魚皮，相當開胃。澳洲手切牛肉，牛味濃郁，厚薄適中，係我今晚食得最多嘅一款牛肉，沒有之一。澳洲 M5 和牛，油花均勻，油脂嘅香氣縈繞口腔，久久不散。澳洲羊肩肉，羊肩肉係滿滿嘅羊味，怕騷嘅朋友千祈唔好試，鍾意食羊嘅我當然係大快朵頤。朱古力火鍋，食完咁多嘢之後再嚟過咁有儀式感嘅朱古力火鍋作結，美妙，呢個儀式感已經遠遠咁樣超越咗好多任食嘅火鍋店，完勝。