魂 (已搬遷) 新店位置

前排去完日本已經好掛住個邊既拉面，日想夜想，搵左好耐最後決定黎試一試呢間都算幾出名既魂。黎到好好彩唔洗排隊。餐廳入面唔算大，坐位唔太多，但裝飾設計已經令我更掛住上次既日本之旅。總共有四款拉面。自己點左青龍，朋友就點左太極。麵質點左"硬"，而醬油揀"中"。青龍拉面。湯底綠色，係秘制菠菜汁配豚肉湯，一黎到已經聞到淡淡既菠菜香。湯底濃郁但又唔會好漏，而且加左菠菜汁感覺好似健康點。叉燒無太乾身都幾嫩滑，唔會太肥。蟹柳出奇地好味，肉厚而且有小小蟹香。玉子（溏心蛋）都係水準之上，食完想再追加多舊。麵質選左硬，所以唔會稔而且幾彈牙。另一碗係朋友點既太極。湯底係墨魚汁配豚肉湯。墨魚汁聞落無好香，但飲左一啖就覺得好有墨魚香味。重點係叉燒上味放左蟹膏，令成碗拉面更新鮮而且帶點蟹膏香。另外追加左木耳，十分爽口。由於呢隻溏心蛋令我有食完再想食既衝動，但又唔想俾錢追加，毫不猶豫咁食埋朋友個隻。整體黎講兩碗拉面湯底出色，麵質配料都有水準。可惜係老闆話拉面店將會搬黎銅鑼灣到九龍區。估計係銅鑼灣區租金太貴，小店難以經營。不過搬鋪後一定會繼續支持。