三才魚蛋粉麵

營業中

休息中

銅鑼灣食嘢普遍都比較貴，所以呢間三才魚蛋粉麵相對之下性價比非常之高，尤其係下午茶餐送魚皮、油菜或者熱飲，兩點幾已經好多人喺門口排隊。除咗抵食之外，三才嘅嘢食全部都係自家製，質素都好高。就好似我最鍾意食嘅炸魚皮，就係舖頭起肉整魚蛋之後，用魚皮去炸。可能係比較新鮮嘅關係，比包裝零食嘅炸魚皮厚身，魚味亦都較濃。我同朋友各叫咗一個茶餐，再加一店腩汁芥蘭。芥蘭非常翠綠嫩口，但咬落去都好腍好易咬。嚟呢度當然唔少得魚蛋魚片河，有魚味當然係基本，魚蛋非常彈牙，不愧係鎮店之寶。由於係清湯湯底，所以加咗餐廳秘製辣椒油調味，辣椒油加咗炸蒜，聞落去好香之餘，辣味亦都好夠好惹味。朋友叫咗牛什麵，都係舖頭自家製。平日豬嘅內臟就食得多，真係比較少食牛雜。除咗牛大腸同牛肚之外，其他都唔係好認到，不過牛味好重，火候十足，好多餸煮到好腍好入味，湯底相對魚蛋河濃，有啲似牛腩湯底。飲品我叫咗杯檸檬菜蜜。朋友叫左杯柚子蜜。